img_5980
Менежмент

Голомт банк хэрхэн 35% өсөлт гаргаж чадсан бэ?

Голомт банкны депозит хэрхэн 35% өссөн бэ?

2016 онд Голомт банкны депозит (харилцагчдын байршуулсан харилцах, хадгаламжийн хэмжээ) 35 хувиар өссөн. Энэ нь бусад 4 том банкны дундаж өсөлт болох 18 хувьтай харьцуулахад өндөр үзүүлэлт юм. Нөгөө талаас 2016 оны эдийн засгийн өсөлт 2009 оноос хойш хамгийн бага төвшинд буюу ердөө 1 хувьтай гарсан.

Тэгэхээр Голомт банк хэрхэн эдийн засаг хүндрэлтэй, өрсөлдөгч банкуудын өсөлт бага байх үед ийм амжилт үзүүлж чадав гэсэн асуулт зүй ёсоор гарч ирнэ.

Энэ бол манай шинэ “Харилцагч Төвтэй Банк” стратегийн үр дүн юм.

Энэ стратегийг гаргахын тулд манай аналистууд 2015 оны эхний хагасыг зөвхөн нөхцөл байдлын анализ хийхэд зарцуулсан. (сайн стратеги гаргахын тулд нөхцөл байдлын анализ хамгийн чухал гэж Сайн стратеги, муу стратеги нийтлэлд бичсэн билээ)

Нөхцөл байдлын анализийг бүх төвшний хүмүүс өөрсдөө хийснээр, тэд нөхцөл байдлаа сайтар мэдэх боломжтой болдог. Улмаар гүйцэтгэх захирлын томъёолсон шинэ стратегийг ойлгох, хэрэгжүүлэхэд хамаагүй хялбар байдаг.

Нөхцөл байдлын анализаас үзэхэд монголын банкуудын үйл ажиллагаа нь харилцагчийн хүсэл эрмэлзэл гэхээсээ илүүтэй банкны дотоод процесст баригдмал болсон байв.

Өөрөөр хэлбэл Банк Төвтэй Харилцагч болсон байсан юм. Банкны юу хүсч байгааг харилцагч хийдэг. Гэтэл эсрэгээр харилцагчийн хүсч байгааг банк хийдэг байх ёстой шүү дээ.

2015 оны сүүлчээс хэрэгжиж эхэлсэн шинэ стратеги маань ердөө 12 сарын дотор бидэнд 35 хувийн өсөлт авчирлаа.

Гэхдээ өнөөдрийг хүртэл банкин дээр дахиад сайжруулах ажлууд зөндөө байна. Бид өөрсдийнхөө зорьж, төсөөлж байгаа “жинхэнэ” харилцагч төвтэй банк болоход дахиад 2 жил шаардлагатай. Ямар ч гэсэн эхний өөрчлөлтүүд маань бодитой үр дүнгээ өгч эхэлсэн нь сайн хэрэг.

Одоо би өнөөдрийг хүртэл шинэ стратегийн хүрээнд хийгдсэн гол хоёр ажлыг тоймлон хүргэе.

Харилцагч төвтэй банк гэдэг нь их энгийн, мэдээжийн юм шиг сонсогдож магадгүй ч үүний цаана үй түмэн процесс өөрчлөлт. Хамгийн гол нь сэтгэлгээний хувьсгал агуулагдаж байгаа юм.

Бид нарийвчилан процесс анализ хийж, харилцагчид 3-4 үйлдлээр хүргэчих үйлчилгээг хэрхэн 8-9 үйлдлээр хүргэж байгаагаа ойлгосон юм. Энэ бүх процессуудыг дахин өөрчлөхийг бизнесийн процессийн ре-инженерчлэл гэж нэрлэж байгаа билээ. Бид нийтдээ 240 тооны өөр өөр процесс дээр анализ хийж өөрчлөлт хийлээ. Энд бас Монгол улсын иргэний бүртгэл, хөрөнгийн бүртгэл, шүүх процесс зэрэг системийн процессийн хоцрогдмол байдлаас болоод товчилж чадаагүй, чадахгүй, хүлээгдэж байгаа өөрчлөлтүүд байгааг дурдах нь зүйтэй.

Мэдээж банкны мэргэжлийн, нарийн процессийн өөрчлөлтүүдийг энд нуршвал төвөгтэй. Энгийн жишээ л хэлэхэд банкуудын салбаруудад ороход ариун цэврийн өрөө нь хаана байгаа нь ойлгомжгүй. Ер нь банкны салбарт үйлчилгээ авахаар хүлээж байгаа харилцагчийн давсаганд гэнэт ачаалал ирвэл яах нь ойлгомжгүй. Гараад хажуу талын ресторан л ордог байх даа. Саяны наадмаар бид эхний 10 салбарынхаа засварын ажлыг дуусгалаа. Энэ салбаруудад харилцагч бүрт харагдахаар, ойлгомжтойгоор хаана ариун цэврийн өрөө байгааг харууллаа. Харилцагч төвтэй банк гэдэг асар том агуулгын доторх болхи нэг жишээ бол энэ юм.

Одоо сэтгэлгээний хувьсгалын талаар яръя. Өмнө нь бид картын дизайн гаргахдаа бусад банкуудын л адил дээр нь ямар зураг тавих вэ гэж боддог байв. Магадгүй та бүгд ЗЭС картын хэрэглэгч бол мэднэ. ЗЭС карт нь өөртөө ховилтой. Энэ ховил нь картаа түрийвчнээс сугалж гаргах ажлыг туйлын хялбар болгодог. Ингээд энэ нь харилцагчид таатай туршлагыг бий болгож байгаа юм.

Зэс карт гарсан эхний 3 сарын дотор л 20,000 эзэмшигчтэй болсон. Өнөөдөр энэ карт монголын зээлийн картын зах зээлийн өнгө төрхийг тодорхойлж байна.

Нөгөө нэг харилцагч төвтэй бүтээгдэхүүн бол Үндэсний Хуримтлал юм. Нөхцөл байдлын анализ хийж үзэхэд банкны хадгаламж нь харьцангуй цөөн хүмүүст төвлөрсөн. Сонирхолтой нь зөвхөн 1 сая гэлтгүй 2, 3 ба 4 сая төгрөгний цалинтай ч байсан хүмүүс бүгд шахуу хадгаламж хийдэггүй нь тодорхой болсон. Цалин өндөр байлаа ч хуримтлал үүсгэдэггүй. Шалтгаан нь ердөө л буруу сэтгэл зүй.

Үндэсний Хуримтлал бол монголын санхүүгийн систем дэх анхны сэтгэл зүйд суурилсан бүтээгдэхүүн юм. Яг л тамхи татахтай адил, хуримтлалыг зуршил болгож болно. Бид үүнийг л хийж байгаа. Одоо гараад 18 сар болж буй Үндэсний Хуримтлал хэдийнэ эгнээндээ 60 мянган хуримтлуулагчийг нэгтгэсэн байна.

Эцсийн дүндээ энэ бол Голомт банкны улс орондоо оруулж буй хувь нэмэр юм. Аль болох олон хүнийг хуримтлалтай болгосноор бидний үйлдэх буян тэр болох юм.

Эцэст нь хэлэхэд салбаруудын бичиг цаасны ачааллыг багасгаж, үйлчлэх-борлуулах чадварыг нэмэгдүүлснээр бид энэ өсөлтийг гаргах боломжтой болсон юм. Манай банкны нийт 1800 гаруй ажилтны дийлэнх нь салбаруудад ажилладаг. Энэ залуучуудын нуугдмал хүчин чадвахыг нээсэн нь манай амжилтын нэг том тулгуур багана болсон гэж хэлж болно.

 

New Call-to-action